09.10.2019   Міндетті әлеуметтік медициналық сақтандыру жағдайында көрсетілетін медициналық қызметтер

     Қазақстанда 2020 жылдан бастап медициналық көмек екі түрлі ТМККК және МӘМС пакеттері бойынша көрсетіле бастамақ. Біріншісі – кепілдендірілген тегін медициналық көмек пакеті. Кепілдендірілген тегін көмек (ТМККК) пакеті ең төменгі стандарттардан тұрады.  

     Оған мынадай қызметтер кіреді: дәрігерлік көмекті қажет ететін шұғыл жағдайларда көмек көрсету, жедел жәрдем, санитарлық авиация, бірқатар созылмалы ауруларды динамикалық бақылау, шұғыл жағдайда стационарда емдеу. Мұны барлық азаматтар, сақтандырылған-сақтандырылмағанына қарамай пайдалана алады.

Мемлекет тарапынан кепілдік берілген көмек бойынша барлық азаматтар емханаға қаралып, стационарда жатып, ем алса болады. Әлеуметтік маңызы бар аурулар осы пакет негізінде тегін емделеді. Медициналық оңалту қызметін тек туберкулезге шалдыққандарға ғана пайдалана алады. Зәру азаматтарға тегістей паллиативтік көмек көрсетіледі. Негізгі жұқпалы емес аурулар мен қоршаған ортаға қауіп төндіретін жұқпалы аурулар да осы тәртіп бойынша емделеді.  

ТМККК пакеті азаматтардың бәріне, бюджет есебінен тегін көрсетіледі. Сондықтан да бұл кепілдендірілген стандарт болып саналады.

      Көмектің екінші деңгейі – міндетті әлеуметтік медициналық сақтандыру (МӘМС) пакеті. Бағасы қымбат болып келетін операциялар, сирек медициналық қызмет түрлері, салалық мамандардың қабылдауы сынды т.б. қызметтер кіретін МӘМС пакетін сақтандырылғандар пайдалана алады.

МӘМС пакетіне табысы орташа азаматтардың қалтасы көтере бермейтін: МРТ, компьютерлік томография, ПЦР-анализ сынды қызметтер де енгізілді. Сондай-ақ, кепілдендірілген тегін көмек пакетіне енбеген сырқаттарға шалдыққан жағдайда стационарды алмастыратын көмек пен жоспарлы стационарлық көмек те МӘМС пакеті шеңберінде көрсетіледі. 

     Міндетті әлеуметтік медициналық сақтандырудың арқасында неге қол жеткіздірміз? Біздің елде азаматтар денсаулыққа жұмсалатын жалпы шығынның 40 процентін өз қалтасынан төлейді. Дәрі-дәрмек сатып алады, ақылы клиникаларға қаралады. Жаңа жүйе осы шығындардың белгілі бір бөлігін сақтандыру есебінен жабуға мүмкіндік береді.

             Мақаланың авторы: Ахмедова Э.С., ЖИТС орталығының маманы

19.09.2019 ж Міндетті әлеуметтік медициналық сақтандыру туралы мәлімет

Елімізде 2020 жылдың 1 қаңтарынан бастап міндетті әлеуметтік медициналық сақтандыру жүйесі толығымен іске қосылады. Міндетті әлеуметтік медициналық сақтандыру жүйесі (МӘМС) – бұл халық денсаулығын қорғау саласында халық мүддесін әлеуметтік тұрғыда қорғайтын мемлекеттік жүйе.
МӘМС жүйесі қатысушыларына дер кезінде, қолжетімді, сапалы медициналық және дәрі-дәрмектік жәрдем көрсетуді қамтамасыз етеді.
МӘМС жүйесіне қатыса алу үшін алдымен мәртебеңізді анықтап алыңыз.
Әлеуметтік мәртебені egov.kz порталы арқылы білуге болады. egov.kz сілтемесі арқылы порталға кіргеннен кейін ЖСН енгізесіз. Содан кейін төмендегі статустың бірін таңдайсыз: «Жұмыс істейді», «Әлеуметтік төлем алушы», «18 жасқа толмаған балалар», «Өзін-өзі жұмыспен қамтушы ретінде тіркелген» және «Мәртебесі анықталмағандар». Егер: жұмыссыз болсаңыз, ХҚКО, Жұмыспен қамту орталығына немесе әкімдікке барып тіркелуіңіз керек. Егер Сіз экономиканың биресми саласында еңбек етсеңіз, онда жеке кәсіпкер (ЖК) ретінде ақша аударасыз немесе Бірыңғай жиынтық төлем төлеуіңіз қажет.
ЖИТС орталығының бас ғимараты 1 қабатының № 14 кабинетінде (ресурстық орталық) E-GOV порталында мемлекеттік қызметтерді алу үшін өзіне-өзі қызмет көрсету бұрышы ашылды.
Кабинетте Интернетке кіруге мүмкіндігі бар 1 компьютер орнатылған.
Екінші жасалатын қадам емханаға E-GOV порталы арқылы тіркелу. Сіз ауыл, елді мекен, қала, аудан, облыстық немесе республикалық маңызы бар қаладағы немесе елордадағы бір ғана емхананы таңдай аласыз. Сондай-ақ, сіз жалпы практика дәрігерін немесе тіркелген емханадағы учаскелік дәрігерді таңдайсыз. Бастапқы медициналық-санитарлық көмекті Медициналық сақтандыру қорымен келісімшарт бекіткен мемлекеттік немесе жеке меншік емханалар көрсетеді. Медициналық мекемелердің тізімімен: https://fms.kz/ru/select-medical-inst сілтемесі арқылы немесе E-GOV порталы арқылы танысуға болады.



Мақаланың авторы: Ахмедова Э.С., ЖИТС орталығының маманы

26.09.2019 Медициналық сақтандыру жүйесі енгізілген кезде мемлекет өз қарауына 15 категориядағы азаматтарды алады

      Қазақстан Республикасында 2020 жылдың 1 қаңтарынан бастап медициналық сақтандыру жүйесі енгізіледі.

Медициналық сақтандыру жүйесі енгізілген күнен бастап мемлекет өз қарауына 15 категориядағы әлсіз топтағы азаматтарды алады. Атап айтқанда:

1. Балалар;
2. Жұмыссыз ретінде тіркелген адамдар;
3. Жұмыс істемейтін жүкті әйелдер;
4. Осы тармақтың №5 тармақшасында көзделген адамдарды қоспағанда, бала (балалар) үш жасқа толғанға дейін оны (оларды) тәрбиелеп отырған жұмыс істемейтін адам (баланың заңды өкілдерінің бірі);
5. Жүктілікке және босануға, жаңа туған баланы (балаларды) асырап алуға байланысты, бала (балалар) үш жасқа толғанға дейін оның (олардың) күтіміне байланысты демалыста жүрген адамдар;
6. Мүгедек балаға күтім жасауды жүзеге асыратын жұмыс істемейтін адамдар;
7. Бала кезінен бірінші топтағы мүгедекке күтім жасауды жүзеге асыратын жұмыс істемейтін адам;
8. Зейнетақы төлемдерін алушылар, оның ішінде Ұлы Отан соғысының қатысушылары мен мүгедектері;
9. Қылмыстық-атқару (пенитенциарлық) жүйесінің мекемелерінде (қауіпсіздігі барынша төмен мекемелерді қоспағанда) сот үкімі бойынша жазасын өтеп жатқан адамдар;
10. Тергеу изоляторларындағы адамдар;
11. Жұмыс істемейтін оралмандар;
12. "Алтын алқа", "Күміс алқа" алқаларымен наградталған немесе бұрын "Батыр ана" атағын алған, сондай-ақ I және II дәрежелі "Ана даңқы" ордендерімен наградталған көпбалалы аналар;
13. Мүгедектер;
14. Орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында

күндізгі оқу нысанында білім алып жатқан адамдар;

15. Мемлекеттік атаулы әлеуметтік көмекті алушы жұмыс істемейтіндер; Жарна Қазақстан Республикасының бюджет заңнамасында айқындалатын тәртіппен ай сайын ағымдағы айдың алғашқы бес жұмыс күні ішінде төленеді.

Мақаланың авторы ЖИТС орталығының маманы Ахмедова Э.С.